Myanmar House Logo

Myanmar House

မြန်မာ့ အိမ်ခြံမြေများ

Myanmar House Logo

သတိထားသင့်တဲ့ မြေအမည်ပေါက် ပျက်ပြယ်သွားနိုင်တဲ့ အချက်များ

December 27, 2022 166 views
သတိထားသင့်တဲ့ မြေအမည်ပေါက် ပျက်ပြယ်သွားနိုင်တဲ့ အချက်များ

မြေဂရန်ဟာ ကိုယ့်အမည်ပေါက် ဖြစ်တယ်ဆိုတာနဲ့ တစ်ထစ်ချ စိတ်ချထားလို့ မရပါဘူး။ မြေဂရန်တွေဟာ နိုင်ငံတော်အစိုးရနဲ့ ဂရန်ရသူတို့အကြား ချုပ်ဆိုတဲ့ ပဋိညာဉ်စာချုပ် တစ်ရပ် ဖြစ်တာကြောင့် ဂရမ်သက်တမ်းနဲ့ ဥပဒေဆိုင်ရာ စည်းကမ်းချက်လေးတွေ ရှိပါတယ်။ မြေအားလုံးရဲ့ မူလပိုင်ရှင်ဟာ နိုင်ငံတော်ဖြစ်တယ်လို့ ဖွဲ့စည်းပုံအခြေခံ ဥပဒေမှာ ဖော်ပြထားပြီး ဖြစ်တာကြောင့် အထူးသဖြင့် မြေငှားဂရန် သက်တမ်းကုန် နေသူများ၊ စည်းကမ်း ပျက်သူများ၊ မြေခွန် ပေးဆောင်ခြင်းမရှိပဲ ပျက်ကွက်သူများအနေနဲ့ ပိုသတိထားသင့်ပါတယ်။ အကြောင်းအမျိုးမျိုးကြောင့် မြေအမည်ပေါက် ပျက်သွားနိုင်တဲ့ အချက်လေးတွေကို စာဖတ်သူတို့ ဗဟုသုတဖြစ်ဖွယ် ဖော်ပြပေးလိုက်ပါတယ်။ 

- "ဤအငှားပေးအပ်ချထားမှုတွင် ပါရှိသည့် မြေကို အငှားပေးအပ် ချထားသည့် ကာလအပိုင်း အခြား ကုန်လွန်သည့်အခါ၊ မြေပေါ်ရှိ အဆောက် အဦးများ၊ အဆောက် အဦးနှင့်တွဲဘက် နေသည်များ မပါရှိစေဘဲ မြေငှားချထားသူသို့ မြေကို အသာတကြည် ပြန်လည်အပ်နှံရမည်" လို့  အောက်မြန်မာပြည် မြို့နဲ့ ကျေးရွာ မြေများ ဥပဒေပါ မြေငှားဂရန် စည်းကမ်းချက်များ အပိုဒ် (၉) မှာ ဖော်ပြထားပါတယ်။ ဆိုလိုတာကတော့ မြေငှားဂရန် သက်တမ်း ကုန်ဆုံးပြီဆိုတာနဲ့ ယင်းမြေကို ဂရန်ရရှိသူက လက်ဝယ်ထားရှိ အသုံးပြုခွင့်မရှိတော့ဘဲ အစိုးရက စီမံချထားတဲ့ မြေအဖြစ်သို့ ပြန်လည်ရောက်ရှိသွားခြင်းပဲ ဖြစ်ပါတယ်။ မြေငှားဂရန်သက်တမ်း ကုန်ဆုံးနေတဲ့ မြေကို ဂရန်အမည်ပေါက်သူ အနေနဲ့ မိမိအမည်ပေါက်မြေလို့ ဆိုနိုင်ခွင့် မရှိတော့ပါဘူး။ ဒါကြောင့် မြေဂရန်သက်တမ်းတိုးဖို့ အထူးလိုအပ်ပါတယ်။ 


- "သတ်မှတ်ထားသည့် မြေငှားခအတွက် အားလုံးကိုဖြစ်စေ၊ အချို့အဝက်ကိုဖြစ်စေ ပေးဆောင်မှုမရှိ ပျက်ကွက်နေပါက၊ ယင်းငွေကို တောင်းခံသည်ဖြစ်စေ၊ မတောင်းခံသည်ဖြစ်စေ ပေးဆောင်ရမည့် နေ့ရက်ကျော်လွန်ကာ၊ ပြက္ခဒိန် လတစ်လ ကုန်လွန်သည်အထိ ပျက်ကွက်နေခြင်း၊ သို့မဟုတ် ဤမြေငှား ချထားမှုစည်းကမ်းအရကို မလိုက်နာ ပျက်ကွက်ခြင်း ဖြစ်ပါက ယင်းပျက်ကွက်မှု အတွက် မြေကို ပြန်လည်သိမ်းယူပိုင်ခွင့် ရှိသည်ကို မည်သို့ပင်လျှော့ပေါ့ပေးသည်ဖြစ်စေ ခရိုင်အုပ်ချုပ်ရေးမှူးသည် ဤအငှား ပေးအပ်ချထားမှုကို ချက်ချင်း ဖျက်သိမ်း၍ မြေနှင့်တကွ မြေပေါ်ရှိ အဆောက်အဦး၊ အဆောက်အဦးနှင့် တွဲဘက်နေသည်များကိုပါ ပြန်လည်သိမ်းယူပိုင်ခွင့်ရှိသည်”  လို့ ဖော်ပြထားတဲ့ မြေငှားဂရန်ပါ စည်းကမ်းချက် အပိုဒ် (၁၀) အရ  မြေခွန် ပေးဆောင်ရန် ပျက်ကွက်ရင်လည်း စည်းကမ်းချက် အပိုဒ် (၁၀) အရ ဂရန်ဖျက်သိမ်းပြီး မြေနဲ့ အဆောက်အဦး များကိုပါ တပါတည်း အပ်နှံရနိုင်ပါတယ်။ ဒါကြောင့် ပေးဆောင်ရမယ့် မြေငှားခများကို မြေငှားဂရန်မှာ ဖေါ်ပြပါရှိတဲ့ ရက်စွဲမှာ ကောက်ခံသည် ဖြစ်စေ၊ မကောက်ခံသည်ဖြစ်စေ မြေငှားဂရန် ရရှိထားသူက အပြေအကျေ ပေးဆောင်ဖို့ သတိပြုသင့်ပါတယ်။ 

- မြေအမည်ပေါက်ဖြစ်သူထံမှ မြေကို အဆင့်ဆင့်ဝယ်ယူထားခဲ့ပြီး မိမိတို့အမည်ပြောင်းခြင်းမပြုခဲ့ရင်လည်း မြေအမည်ပေါက် ကွယ်လွန်သွားတဲ့အခါ ကိုယ်စားလှယ်ပါဝါ အလိုအလျောက်ပျက်ပြယ်သွားတတ်ပါတယ်။ အဲ့ဒီ့အခါ ဝယ်သူအမည် ပြောင်းနိုင်ဖို့အတွက် ဥပဒေနဲ့ ကိုက်ညီတဲ့ အခြားနည်းလမ်းရှာဖွေရခြင်း၊ မြေအမည်ပေါက်သူရဲ့ မိသားစုကို ရှာဖွေစုံစမ်း အကူအညီတောင်းပြီး ဝယ်သူကို အမည်ပေါက်ပြောင်းပေးရန် ဆောင်ရွက်ပေးဖို့ တောင်းဆိုရခြင်းတို့ ပြုလုပ်ရပါတယ်။ တကယ်လို့ အမည်ပေါက်ရဲ့ မိသားစုတွေလည်း မရှိကြဘူးဆိုရင်တော့ တရားရုံးက အိမ်အရောင်းအဝယ် ကတိစာချုပ် မှတ်ပုံတင်ချုပ်ဆိုပေးစေလိုမှုနဲ့ တရားပြိုင်အဖြစ် တရားစွဲခံရနိုင်ပါတယ်။ မိမိအမည်ပေါက် ပြောင်းလဲလိုက်ရင်တော့ အထက်မှာ ဖော်ပြထားတဲ့ အခက်အခဲ အရှုပ်အထွေးတွေ မရင်ဆိုင်ရပဲ မြေပိုင်ဆိုင်မှုနဲ့ ပက်သက်ပြီး ရောင်းချလိုကဖြစ်စေ၊ မိမိလက်ဝယ်ထားလိုကဖြစ်စေ၊ အဆင်ပြေ ချောမွေ့စေမှာ ဖြစ်ပါတယ်။ ဒါကတော့ သတိထားဖွယ်ရာ အချက်တစ်ခုပဲ ဖြစ်ပါတယ်။ 

Credit to original uploader

Related Posts