Myanmar House Logo

Myanmar House

မြန်မာ့ အိမ်ခြံမြေများ

Myanmar House Logo

ကွန်ကရစ်တိုင်များ ပြန်လည်ပြုပြင်ခြင်း

January 2, 2023 354 views
ကွန်ကရစ်တိုင်များ ပြန်လည်ပြုပြင်ခြင်း

ကွန်ကရစ်တိုင်များ ပြန်လည်ပြုပြင်ခြင်း
================================ =
ကွန်ကရစ်တိုင်များ ပျက်စီးခြင်းဆိုတာကတော့ အများအားဖြင့် ပုံစံခွါပြီးရင် တွေ့ရှိရတတ်တဲ့ ပျက်စီးချို့ယွင်းမှုများကို ဆိုလိုပါတယ်။။ အဲ့ဒီလို ပြုပြင်မှု ဆောင်ရွက်တဲ့အခါ အရေးကြီးတဲ့ အချက်လေးချက်ရှိပါတယ်။

နံပါတ်တစ်အနေနှင့် Expediency လို့ခေါ်တဲ့ ပြုပြင်မှုကို ချက်ချင်းမလုပ်ရင် ကြာလာတာနှင့်အမျှ ပျက်စီးမှုများလာမှာဖြစ်ပြီး အလုပ်လည်း ပိုလာမှာဖြစ်ပါတယ်။ ဒါကြောင့် ချက်ချင်းပြုပြင်ဆောင်ရွက်ဖို့ လိုအပ်ပါတယ်။

နံပါတ်နှစ်အနေနှင့် သန့်ရှင်းအောင်ဆောင်ရွက်ခြင်းဖြစ်ပါတယ်။ ကွန်ကရစ်များကို ဖာထေးပြုပြင်တော့မယ်ဆိုရင် အမှိုက်သရိုက်များ၊ ဖုန်များ၊ အခြားဓာတုပစ္စည်းများကင်းရှင်းအောင် သန့်စင်ပေးဖို့အထူးလိုအပ်ပါတယ်။ ဒါမှသာလျှင် ရှိပြီးသားကွန်ကရစ်နှင့် ကုပ်တွဲပေါင်းစည်းမှုအား Bonding ကောင်းမှာဖြစ်ပါတယ်။

နံပါတ်သုံးအနေဖြင့် အဲ့ဒီလို ကွန်ကရစ်များ ပြုပြင်ဖာထေးဖို့အတွက် အရေးကြီးတဲ့ ကွန်ကရစ်နည်းပညာနှင့် အသုံးပြုမယ့် ကိရိယာများကို ရွေးချယ်ခြင်းဖြစ်ပါတယ်။

နံပါတ်လေးနောက်ဆုံးအနေနှင့် အသုံးပြုမည့် ပစ္စည်း material ၏ ကြာရှည်ခိုင်ခံမှု Durable ပဲ ဖြစ်ပါတယ်။

ကွန်ကရစ်များကို ပြုပြင်ဖာထေးတဲ့အခါ ကွန်ကရစ်သက်တမ်းနုတဲ့အချိန်မှာ လုပ်တာအကောင်းဆုံးဖြစ်ပါတယ်။ ထို့အပြင် အထက်ကပြောသလို သန့်ရှင်းစင်ကြယ်အောင် ဆောင်ရွက်ပြီးမှသာလျှင် ပြုပြင်ဖာထေးမှုကို လုပ်မှ တသားတည်းဖြစ်ပြီး ရှိပြီးသားကွန်ကရစ်နှင့် ကုပ်တွယ်မှုကောင်းမှာ ဖြစ်ပါတယ်။

အသုံးပြုတဲ့ Materials များ

ရှေးဦးစွာ အသုံးပြုမည့် ပစ္စည်းများကို သတ်မှတ်ပြီး ကိရိယာများကို ပြင်ဆင်ထားရမှာဖြစ်ပါတယ်။ ကွန်ကရစ်တိုင်များ ပြုပြင်ဖာထေးတဲ့အခါ အသုံးများတဲ့ ပစ္စည်းတွေကတော့ အောက်ပါအတိုင်းဖြစ်ပါတယ်။

Portland Cement and White Portland Cement; ကွန်ကရစ်များကို ဖာထေးတဲ့အခါမှာ တချို့ဘိလပ်မြေများသည် ဖာထေးတဲ့နေရာတွင် အကွက်လိုက်(အမဲကွက်)အရောင်ကွဲပြီး ကျန်နေတတ်ပြီး၊ မူလကွန်ကရစ်သား၏အရောင်နှင့်ကွဲတဲ့အတွက် အမြင်မကောင်းမှုများ ဖြစ်တတ်ပါတယ်။ ဒါကြောင့် အသုံးပြုမယ့် ဘိလပ်မြေကို သေချာရွေးပေးရမှာဖြစ်ပါတယ်။ Portland cement နှင့် white Portland cement များကို အသုံးပြုခြင်းအားဖြင့် ယင်းပြသနာများကို ရှောင်ရှားနိုင်မှာဖြစ်ပါတယ်။

Aggregate and Sand; ရောစာကြီးနှင့် သဲအနေဖြင့် ထုံးကျောက်နုများကို အသုံးပြုခြင်းဖြင့် အရောင်ကို ပိုတောက်စေမှာဖြစ်ပါတယ်။

Gauging Liquid; ရေနှင့် polymeric meterials များ ရောစပ်ထားသော Styrene Butadience rubber(SBR)များ၊ Polyvinyl Acetate(PVA) သို့မဟုတ် Acrylic Material များကို အသုံးပြုသင့်ပါတယ်။ ၎င်းတို့ကို ကော်ရည်အနေဖြင့် အသုံးပြုခြင်းအားဖြင့် မူလကွန်ကရစ်နှင့် စေးကပ်မှုအားပိုမိုကောင်းမွန်စေမှာ ဖြစ်ပါတယ်။ ထို့အပြင် ကွန်ကရစ်၏ ခံနိုင်ရည်၊ မာကျောမှု စတဲ့ ရုပ်ပိုင်းဆိုင်ရာ ဂုဏ်သတ္တိများ တိုးလာစေမှာဖြစ်ပါတယ်။

ကွန်ကရစ် အက်ကွဲမှုများကို ဖာထေးတဲ့အခါ အထက်ပါပစ္စည်းများကို အဓိကာအားဖြင့် အသုံးပြုလျက်ရှိပြီး တခါတရံတွင် အက်ကွဲမှုအရွယ်အစားး crack width အပေါ်မူတည်ပြီး Epoxy သို့မဟုတ် Polyester resin များ လိုအပ်လာနိုင်ပါတယ်။

အကယ်၍ ကြီးကြီးမားပြုပြင်ဖာထေးမှုများဆိုပါက Formwork, Formwork Tie, clamps နှင့် ကြိုးများ လိုအပ်လာမှာ ဖြစ်ပါတယ်။ ပြုပြင်ဖာထေးတဲ့အပိုင်းကို အသားနပ်ဖို့ curing လုပ်ဖို့အတွက် ပလာစတစ်အခင်းများ လိုအပ်ပါမယ်။

Repairing of Honeycombed Concrete

အများအားဖြင့်တော့ တိုင်တွေမှာ honeycomb ထတာတို့ကို သရွက်နှင့်ပဲ သိပ်ထည့်ပြီး ဖာထေးမှု ပြုလုပ်ရပါတယ်။ ထိုသို့ ဖာထေးမှုကို အောက်ပါအတိုင်း အဆင့်ဆင့် ဆောင်ရွက်ရပါတယ်။

၁။ ပထမဦးစွာ Honeycomb ပေါ်နေတဲ့၊ ထတဲ့အပိုင်းကို တူနှင့် ဆောက်နှင့် ထွင်းပြီး ဖယ်ရှားရပါတယ်။

၂။ အဲ့နေရာကို Brush နှင့် ပွတ်တိုက်ပြီး ဖုန်မှုန့်များ၊ အမှိုက်များ ဖယ်ရှား သန့်ရှင်းပေးရပါတယ်။

၃။ ထို့နောက် သိပ်မည့်သရွက်၊ကွန်ကရစ်ကို ပြင်ဆင်ရပါတယ်။ Thumb Rule အရ ဘိလပ်မြေနှင့် ထုံးကျောက်မှုန့်(အနု)ကို ၁:၂ အချိုးဖြင့် အသုံးပြုလေ့ရှိပါတယ်။ ဘိလပ်မြေကိုတော့ White Portland Cement ကို အသုံးပြုရပါတယ်။
အသုံးပြုမယ့်ရေကတော့ ရေနှင့် polymer ဆတူပါဝင်သင့်ပါတယ်။

၄။ ရောစပ်လိုက်တဲ့ သရွက်များအနေဖြင့် ဒေါင်လိုက်မျက်နှာပြင်များကို ဖာထေးမယ်ဆိုရင် ပျစ်တွဲမှု slump နည်းအောင် လုပ်ရပါတယ်။

၅။ ထို့နောက်တွင် သရွက်များကို ဖာထေးမယ့်အခေါင်းထဲ ထိုးသိပ်ပြီး သိပ်သည်းမှုကောင်းအောင် သံတုတ်ဖြင့် ထိုးပေးရပါတယ်။ ပြီးမှ သလက်နှင့် မျက်နှာပြင်ကို သပ်ပေးရပါတယ်။

၆။ နောက်ဆုံးတွင် ယင်းနေရာကို ပလာစတစ်ဖြင့် ပတ်၍ တိတ်ဖြင့် ကပ်ထားပြီး curing လုပ်ပေးရပါတယ်။

အကယ်၍ honeycomb က အလွန်ဆိုးဝါးပြီး အရမ်းကြီးနေလျှင် ယင်းနေရာကို section တစ်ခုပိုင်းခြားပြီး ပြန်ဖျက်ပေးရပါတယ်။ အကယ်၍ တိုင်နှင့်ထုတ်တန်းနေရာများတွင် အဲ့ဒီလို လုပ်ဖို့လိုအပ်လာရင် ၎င်းတို့ကို ထောက်မထိန်းချုပ်ဖို့ ထောက်ကန်ဖို့ လိုအပ်လာပါမယ်။ 
ထိုသို့ ငြမ်းဆင်၊ ထောက်မပြီး နောက် ဖာထေး၊ ကွန်ကရစ်ပြန်လောင်းမည့် အပိုင်းကို သန့်ရှင်းအောင်ပြုလုပ်ခြင်းများ ဆောင်ရွက်ရပါတယ်။

ကွန်ကရစ်သားများတွင် အပေါက်များ၊ အစက်ပြောက်များဖြစ်ပေါ်ခြင်းများကို ပြုပြင်ဖာထေးတဲ့အခါ Bagging in လို့ခေါ်တဲ့ နည်းပညာကို အသုံးပြုပါတယ်။ ယင်းနည်းပညာတွင် Hession pad ကို အသုံးပြီး ဘိလပ်မြေသရွက်များဖြင့် ကွန်ကရစ်မျက်နှာပြင်ကို ပွတ်တိုက် ဂျီးချွတ်ပေးရတာပဲဖြစ်ပါတယ်။ ယင်းဘိလပ်မြေများကို ပုံမှန်သရွက်များလိုပင် ၁း၃ ၊ ၂း၄ အချိုးဖြင့် ဖျော်စပ်အသုံးပြုနိုင်ပါတယ်။

Credit

ဆရာ ထန်ပီး(NYRDDC,MDY)

Related Posts