Myanmar House Logo

Myanmar House

Real Estate in Myanmar

သွေးပေါင်ချိန်တက်ခြင်းအား ဆေးဝါးမပါဘဲ ထိန်းချုပ်ရန် နည်းလမ်း ၁၀ ခု - အပိုင်း (၁)

March 14, 2023 245 views
သွေးပေါင်ချိန်တက်ခြင်းအား ဆေးဝါးမပါဘဲ ထိန်းချုပ်ရန် နည်းလမ်း ၁၀ ခု - အပိုင်း (၁)

အကယ်၍ သင့်သွေးပေါင်ချိန်က တက်နေတယ်ဆိုရင် ၎င်းသွေးပေါင်ချိန်ကိန်းဂဏန်းတွေကျဆင်းဖို့အတွက် ဆေးဝါးအကူအညီလိုအပ်ခြင်းရှိမရှိကို သိချင်ပါလိမ့်မယ်။ တကယ်တော့ သွေးဖိအားမြင့်မားခြင်း (သို့) သွေးပေါင်ချိန်တက်ခြင်းကို ကုသရာမှာ ဘဝနေထိုင်မှုဟန်ပန်ပုံစံက အဓိကအခန်းကဏ္ဍကနေ ပါဝင်ပါတယ်။ သွေးဖိအားကို ကျန်းမာတဲ့ဘဝနေထိုင်မှုပုံစံဖြင့် ထိန်းချုပ်ခြင်းက ဆေးဝါးအကူအညီလိုအပ်မှုကို နည်းစေနိုင်ပါတယ်။

အောက်ဖော်ပြပါဘဝနေထိုင်မှုပုံစံပြောင်းလဲမှုတွေ လုပ်ဆောင်ခြင်းဖြင့် သင်ဟာ သွေးဖိအားမြင့်မားခြင်းကို နိမ့်ကျစေနိုင်ပြီး နှလုံးရောဂါအန္တရာယ်ကိုလည်း လျှော့ချနိုင်မှာဖြစ်ပါတယ်။

၁။ အဆီပိုများ လျှော့ချကုန်ခန်းစေပြီး ခါးအတိုင်းအတာအား ထိန်းသိမ်းခြင်း

ကိုယ်အလေးချိန်တိုးလာတာကြောင့်လည်း သွေးပေါင်ချိန်တက်တတ်ပါတယ်။ အရပ်နဲ့လိုက်ဖက်စွာ ရှိသင့်တဲ့ကိုယ်အလေးချိန်ထက် ဝဖြိုးခြင်းကလည်း အိပ်ပျော်နေစဉ်မှာ အသက်ရှူမှုလုပ်ငန်းစဉ်ကို အနှောင့်အယှက်ဖြစ်အလျဉ်ပြတ်စေနိုင်ကာ အဲဒီကတစ်ဆင့် သွေးဖိအားကို မြင့်တက်စေနိုင်ပါတယ်။ ယေဘုယျအားဖြင့်ဆိုရရင် ကိုယ်အလေးချိန် ၁ ကီလိုဂရမ် (၂ ဒသမ ၂ ပေါင်ခန့်) ကျဆင်းပါက သွေဖိအားလည်း

၁ mm Hg ခန့် ကျဆင်းနိုင်ပါတယ်။

ခါးအရွယ်အစားကလည်း အရေးကြီးပါသေးတယ်။ ခါးဧရိယာတစ်ဝိုက်မှာ အဆီပိုတွေ ရှိနေခြင်းက သွေးပေါင်ချိန်မြင့်မားဖို့ အန္တရာယ်များစေနိုင်ပါတယ်။ ယေဘုယျအားဖြင့်တော့ အမျိုးသားတွေမှာ ခါးအတိုင်းက လက်မ ၄၀ (၁၀၂ စင်တီမီတာ) ကျော်ရင် အန္တရာယ်ရှိပြီး အမျိုးသမီးတွေမှာ ခါးအတိုင်းက ၃၅ လက်မ (၈၉ စင်တီမီတာ) ကျော်ရင် အန္တရာယ်ရှိပါတယ်။

၂။ ကိုယ်လက်လေ့ကျင့်ခန်းပုံမှန်ပြုလုပ်ခြင်း

ကိုယ်ကာယလှုပ်ရှားမှုပုံမှန်ပြုလုပ်ခြင်းက သွေဖိအားကို ၅ မှ ၈ mm Hg အထိ ကျဆင်းစေနိုင်ပါတယ်။ သွေးပေါင်ပြန်မတက်စေဖို့ရာ ကိုယ်လက်လေ့ကျင့်ခန်းမှန်မှန်ပြုလုပ်ပေးဖို့ အရေးကြီးပါတယ်။ ယေဘုယျပန်းတိုင်တစ်ရပ်အနေနဲ့ အတန်အသင့်သော ကိုယ်လက်လှုပ်ရှားမှုကို နေ့စဉ် အနည်းဆုံး မိနစ် ၃၀ ကြာ ပြုလုပ်ဖို့ ရည်မှန်းထားပါ။

ကိုယ်လက်လှုပ်ရှားခြင်းဟာ သွေးပေါင်ချိန်တက်ခြင်းကို သွေးတိုးခြင်း (သွေးတိုးရောဂါ) အဖြစ် မပြောင်းလဲသွား‌အောင်လည်း ကူထိန်းပေးနိုင်ပါတယ်။ သွေးတိုးရောဂါရှိသူတွေအတွက် ပုံမှန်ကိုယ်လက်လှုပ်ရှားမှုဟာ သွေးဖိအားကို စိတ်ချရတဲ့အဆင့်တွေအထိ ကျဆင်းစေနိုင်ပါတယ်။

ကိုယ်လက်လှုပ်ရှားမှုလေ့ကျင့်ခန်းဥပမာများ - လမ်းလျှောက်ခြင်း၊ ရွရွပြေးခြင်း၊ စက်ဘီးစီးခြင်း၊ ရေကူးခြင်း၊ ကခုန်ခြင်း။

၃။ ကျန်းမာရေးနှင့်ညီညွတ်စွာ စားသောက်ခြင်း

အစေ့အဆန်၊ အသီးအနှံ၊ ဟင်းသီးဟင်းရွက်နဲ့၊ အဆီပါဝင်မှုနည်းသော နို့ထွက်ထုတ်ကုန်များနဲ့၊ ပြည့်ဝဆီနဲ့ ကိုလက်စထရောပါဝင်မှုနည်းသော အစားအစာများ စားသောက်ခြင်းက မြင့်တက်နေတဲ့ သွေးဖိအားကို ၁၁ mm Hg အထိ လျှော့ချပေးနိုင်ပါတယ်။

အစားအစာထဲမှာပါတဲ့ ပိုတက်ဆီယမ်က ဆား (ဆိုဒီယမ်) ရဲ့ သွေးဖိအားအပေါ် သက်ရောက်မှုကို နည်းစေနိုင်ပါတယ်။ ပိုတက်ဆီယမ်ပါဝင်မှုအများဆုံးကတော့ ဖြည့်စွက်ဆေးဝါးတွေမှာ မဟုတ်ဘဲ အသီးအနှံတွေနဲ့ ဟင်းသီးဟင်းရွက်တွေလိုမျိုး အစားအစာတွေမှာပဲဖြစ်ပါတယ်။

၄။ သင့်စားသောက်မှုတွင် ဆား (ဆိုဒီယမ်) လျှော့ချပါ

စားသောက်မှုမှာ ဆိုဒီယမ်ပမာဏကို အနည်းငယ်လေးလျှော့ချလိုက်ရုံနဲ့တင် နှလုံးကျန်းမာရေးကို ပိုမိုကောင်းမွန်စေနိုင်ပြီး တက်နေတဲ့သွေးပေါင်ချိန်ကိုလည်း ၅ မှ ၆ mm Hg အထိ လျော့ကျစေနိုင်ပါတယ်။

စားသောက်မှုမှာ ဆိုဒီယမ်ကို လျှော့ချဖို့ဆိုရင် -

- အစားအစာရဲ့ အညွှန်းတွေကို ဖတ်ရှုပါ၊ ဆိုဒီယမ်ပါဝင်မှုနည်းတဲ့ အစားအသောက်တွေကို ရှာဖွေပါ။

- ပြုပြင်ထားတဲ့ အစားအသောက်များ လျှော့စားပါ။ အစားအစာတွေမှာ သဘာဝအတိုင်းပါဝင်တဲ့ ဆိုဒီယမ်ပမာဏဟာ တကယ့်ကို နည်းနည်းလေးပါ။ ဆိုဒီယမ်အများစုကိုက အစားအစာတွေကို ပြုပြင်ခိုက်မှာ ဖြည့်စွက်ထည့်လိုက်ကြတာဖြစ်ပါတယ်။

- ဆားထပ်မထည့်ပါနဲ့။ အစားအစာတွေကို အရသာအဆင်မပြေလို့ ပြုပြင်တဲ့အခါ ဆားအစား ဟင်းခတ်အမွှေးအကြိုင်တွေ သုံးပါ။

- ချက်ပါ။ ချက်ပြုတ်ခြင်းက အစားအစာထဲက ဆိုဒီယမ်ပမာဏကို ထိန်းချုပ်ခွင့်ရစေပါတယ်။

၅။ အရက်ကို ကန့်သတ်ပါ

အရက်အလွန်အကျွံသောက်ခြင်းဟာ သွေးဖိအားကို များစွာမြင့်တက်စေနိုင်တဲ့အပြင် သွေးဖိအားနဲ့ပတ်သက်လို့ ကုသတဲ့ဆေးဝါးတွေရဲ့ ထိ‌ရောက်မှုအာနိသင်ကိုပါ လျော့ကျစေနိုင်ပါတယ်။

ဒါကြောင့် အမျိုးသမီးများအတွက်ဆို တစ်နေ့ တစ်ခွက်အများဆုံးသောက်ရန် ကန့်သတ်ခြင်းနဲ့ အမျိုးသားများအတွက် တစ်နေ့လျှင် နှစ်ခွက်အများဆုံးသောက်ရန် ကန့်သတ်ခြင်းက သွေးဖိအားကို ၄ mm Hg ခန့် ကူညီလျှော့ချပေးနိုင်ပါတယ်။ အရက်တစ်ခွက်လျှင် ဘီယာ ၁၂ အောင်စ၊ ဝိုင် ၅ အောင်စနဲ့ ညီမျှပါတယ်။

Credit: Original Uploader

Related Posts